တနေဝင်သော်(ဇာတ်သိမ်း)
တနေဝင်သော် ရေးသားသူ – အညတြ 🏵️ အပိုင်း (၂) [ဇာတ်သိမ်း] 🏵️ နှစ်နိုင်ငံ နယ်စပ်က မဲပုံရွာကြီး ။ ဒီနယ်စပ်ဒေသက ရှေးခေတ်ကတည်းက မင်းမဲ့ဆန်ခဲ့သည် ။ ဝရမ်းပြေးတွေ လူဆိုးလူမိုက်တွေ ခိုအောင်း ကျက်စားကြတဲ့ ဒေသ ။ ရှေးခေတ်ကတည်းက ဟိုဖက်တိုင်းပြည် နယ်ခြားစောင့်ရဲလို အဖွဲ့တွေကလည်း ငွေပေးရင် မသိချင်ယောင်ဆောင်နေတတ်တဲ့ အမျိုး ။ ရွာကြီး ဆိုပေမယ့် မသေးလှ ။ ဟိုးရှေးရှေးက ဒီရွာကြီးမှာ ရဲစခန်း ရှိသည် ။ ရုပ်ရှင်ရုံအကြီးစား ရှိသည် ။ ဟိုတယ်တွေ ကေတီဗီဆိုင်တွေ အရက်ဆိုင်တွေ နိုက်ကလပ်တွေ အစုံ ရှိသည် ။ လောင်းကစားဝိုင်းတွေက နေ့ရောညပါ ၂၄ နာရီ ဖွင့်ထားသည် ။ အခုတော့ စစ်ကြီးကြောင့် လျှပ်စစ်မီး မရတော့ ။ ဓါတ်ဆီလောင်စာဆီတွေလည်း ပြတ်နေလို့ မဲမှောင်တိတ်ဆိတ်နေသည် ။ တချက်တချက် လောခေါင်မောင်ပွေးရဲ့ တပ်ဖွဲ့တွေ စီးတဲ့ မော်တော်ဆိုင်ကယ်သံတွေ တဗီးဗီးဘဲ ကြားနေရသည် ။ တခါတခါတော့ အရက်မူးလို့ မိုးပေါ်ထောင်ဖောက်တတ်တဲ့ မောင်ပွေးစခန်းက သေနတ်သံတွေ ကြားရတတ်သည် ။ အင်အားကြီးနိုင်ငံက လာဖွင့်ထားတဲ့ စစ်စခန်းကို အားပြိုင် အင်အားကြီး တစ်နိုင်ငံက ချေမှုန်းတဲ့ နျူကလီးယား ဗုံးကျလို့ ဒီဗုံးက မဲပုံရွာကြီးဆီကို ထိရောက်မှု ရှိခဲ့သည် ။ ပျက်စီးယိုယွင်းနေတဲ...
